തൊണ്ടർനാട് ഗ്രാമപഞ്ചായത്ത്

ചരിത്രം • കാർഷിക പൈതൃകം • സാമൂഹിക ജീവിതം • സാംസ്കാരിക പാരമ്പര്യം

📜 ചരിത്രം

സൂര്യനസ്തമിക്കാത്ത ബ്രിട്ടീഷ് സാമ്രാജ്യത്തോട് അവസാനശ്വാസം വരെ പൊരുതി വീരമൃത്യു വരിച്ച കേരളവർമ്മ പഴശ്ശിരാജാവിന്റെ മായാത്ത പാദമുദ്രകൾ പതിഞ്ഞതാണ് തൊണ്ടർനാട്ടിലെ മണ്ണ്.

📜 ചരിത്രം

കോട്ടയം ഭരണകാലത്തെ വയനാട്ടിലെ പത്തു നാടുകൾ — മൂത്തോർനാട്, ഇലംകൂർനാട്, വയനാട് സ്വരൂപം, പൊരുന്നന്നൂർ സ്വരൂപം, നല്ലൂർനാട് സ്വരൂപം, കുറുമ്പാലനാട് സ്വരൂപം, എടനാലംക്കൂർ, തൊണ്ടർനാട്, വേലിയമ്പം, പാക്കം സ്വരൂപം — ഇവയായിരുന്നു.

നെല്ലിയോട് തിരുമൽപ്പാടിനവകാശപ്പെട്ട തൊണ്ടർനാടിന്റെ ഭരണം നടത്തിയത് തൊണ്ടർ നമ്പിയാരായിരുന്നു. തൊണ്ടർ നമ്പിയാർ ഭരിച്ച നാടിന് തൊണ്ടർനാട് എന്നു പേർ കിട്ടി.

കുറ്റ്യാടിപുരം വഴി അഞ്ച് കമ്പനി നാടൻ ശിപായികളും ഒരു കമ്പനി യൂറോപ്യൻ സൈനികരും മേജർ ഹൈഡന്റെ നേതൃത്വത്തിൽ തൊണ്ടർനാട്ടിൽ എത്തിയിരുന്നു. ഇതുപോലെ പഴശ്ശി ചരിത്രവുമായി ബന്ധപ്പെട്ട നിരവധി സ്ഥലങ്ങൾ വയനാട്ടിലെ ഈ പഞ്ചായത്തിലുണ്ട്.

1805 നവംബർ 30ന് വീരപഴശ്ശിയുടെ ചരമത്തോടെ തൊണ്ടർനാട് ബ്രിട്ടീഷുകാരുടെ അധീനതയിലായി. 1863 ജനുവരിയിൽ തൊണ്ടർനാട് അംശം നിലവിൽ വന്നു.

1877-ൽ അന്നത്തെ മലബാർ കലക്ടർ ആയിരുന്ന വില്യം ലോഗൻ മാനന്തവാടിയിലേക്ക് വന്നത് കുറ്റ്യാടി ചുരം വഴി തൊണ്ടർനാട്ടിലൂടെയാണ്. അദ്ദേഹം കോറോം ടി.ബിയിൽ താമസിക്കുകയും ചെയ്തു.

ഈ പ്രദേശത്തെ കൃഷി, ഭൂപ്രകൃതി, സസ്യജാലങ്ങൾ, ജനങ്ങളുടെ ജീവിതരീതി എന്നിവ അദ്ദേഹത്തിന്റെ വിഖ്യാത ചരിത്ര-പഠന ഗ്രന്ഥമായ മലബാർ മാനുവലിൽ രേഖപ്പെടുത്തിയിട്ടുണ്ട്. കോറോം പോലീസ് സ്റ്റേഷൻ അന്ന് ഈ പഞ്ചായത്തിൽ ഉണ്ടായിരുന്നതായും രേഖപ്പെടുത്തിയിട്ടുണ്ട്.

സ്വാതന്ത്ര്യാനന്തരം കേരളത്തിലാകെ അലയടിച്ച ജന്മിത്തവിരുദ്ധ സമരത്തിന്റെ അലയൊലികൾ ഇവിടെയുമുണ്ടായിട്ടുണ്ട്. 1950-കളിൽ പാട്ടവ്യവസ്ഥക്കെതിരായ പ്രതിഷേധങ്ങൾ അങ്ങിങ്ങ് ഉയരുകയുണ്ടായി. 50-കളിലെയും മറ്റും ശക്തമായ കുടിയേറ്റമാണ് എടുത്തുപറയേണ്ട മറ്റൊരു വസ്തുത.

ഇവിടുത്തെ കൃഷിഭൂമി പ്രധാനമായും ശ്രീപുള്ളി മാലമ്മ ദേവസ്വം, പൊറളോം ദേവസ്വം, പാലേരി ദേവസ്വം എന്നീ ദേവസ്വങ്ങളുടെയും ഏതാനും വൻകിട ജന്മിമാരുടേയും കൈവശമായിരുന്നു.

ആദ്യകാലങ്ങളിൽ നെൽകൃഷി വളരെ വ്യാപകമായിരുന്നു. ജൈവവളം (പച്ചിലവളവും ചാണകവും) ഉപയോഗിച്ചു മാത്രമായിരുന്നു അന്നാക്കെ കൃഷി.

കാപ്പിത്തോട്ടങ്ങളിൽ ധാരാളമായി ഓറഞ്ച് കൃഷി ചെയ്തിരുന്നു. കാച്ചിലിനോട് സാമ്യമുള്ള കണ്ടിക്കിഴങ്ങ് ഒരു പ്രധാന വിളയായിരുന്നു. ക്ഷാമകാലത്ത് മുഖ്യ ആഹാരപദാർത്ഥവും, കുടിയേറ്റകാലം വരെ കാർഷികമേഖലയിൽ ആദിവാസികൾ മാത്രമായിരുന്നു തൊഴിലാളികൾ.

നെൽകൃഷിക്കാലത്ത് “കംമ്പള”ങ്ങൾ നടത്തിയിരുന്നു. നിലം ഉഴുന്നതിനും നെല്ല് മെതിക്കുന്നതിനും കാലികളെയാണ് ഉപയോഗിച്ചിരുന്നത്.

നിർദ്ദിഷ്ട മാനന്തവാടി ജലവൈദ്യുത പദ്ധതി 1970 കാലഘട്ടങ്ങളിൽ നടപ്പാകുമെന്നുറപ്പിച്ച് പുരയിടങ്ങളിൽ മരങ്ങൾ മുറിച്ചുനീക്കുകയും ഹ്രസ്വകാലവിളകൾ മാത്രം കൃഷി ചെയ്യുകയുമുണ്ടായി.

1940-കളിൽ ആരംഭിച്ച കുടിയേറ്റം ഈ പഞ്ചായത്തിലെ കാർഷിക അഭിവൃദ്ധിയെ ത്വരിതപ്പെടുത്തി. 1950-കളിൽ കുടിയേറ്റം വ്യാപകമായി. കുടിയേറ്റക്കാർ അന്നത്തെ ജന്മികളിൽ നിന്നും സ്ഥലം പാട്ടത്തിനെടുത്താണ് കൃഷി ചെയ്തിരുന്നത്.

നെല്ല്, കോഴി, കന്നുകാലി, പശുവിൻനെയ്യ് എന്നിവയാണ് പാട്ടമായി നൽകിയിരുന്നത്. സ്ഥലം വാങ്ങിക്കുമ്പോൾ ഇവ തന്നെയാണ് പ്രതിഫലമായി നൽകിയിരുന്നത്.

മരച്ചീനി, തെരുവപ്പുല്ല്, കരിമ്പ് എന്നിവ കുടിയേറ്റക്കാർ ഇവിടെ പുതുതായി കൊണ്ടുവന്നതാണ്. കുടിയേറ്റക്കാർ ആദ്യമൊക്കെ നിലനിന്നുപോന്നതും മരച്ചീനിയേയും പുൽതൈലത്തേയും ആശ്രയിച്ചാണ്. എന്നാൽ വനനശീകരണത്തിനും ഈ കൃഷികൾ കാരണമായി.

👥 സാമൂഹിക ചരിത്രം

കൊടുമല കുങ്കിയുടെയും കേരളവർമ്മ പഴശ്ശിരാജാവിന്റെയും ചരിത്രസ്മരണകൾ ഉറങ്ങിക്കിടക്കുന്ന ഐതിഹ്യങ്ങൾ ഏറെയുള്ള പ്രദേശമാണ് ഈ ഗ്രാമം.

കൊടുമല കുങ്കിയുടേതെന്ന് പറയുന്ന കോട്ടയുടെതോ കളരിയുടെതോ ആയ അവശിഷ്ടങ്ങൾ ഇവിടെയുണ്ട്. കുങ്കിച്ചിറയും പരിസരങ്ങളും സംസ്കാരസമ്പന്നമായ ഒരു പഴയകാലത്തെ ഓർമ്മിപ്പിക്കുന്നു.

ഇംഗ്ലീഷുകാരുടെയും ശ്രദ്ധാകേന്ദ്രമായിരുന്നു ഈ പ്രദേശമെന്ന് മക്കി സായ്പിന്റെ ബംഗ്ലാവും കോറോം ടി.ബിയും വെളിപ്പെടുത്തുന്നു.

വായ്മൊഴിയിലൂടെ കൈമാറപ്പെട്ട പാരമ്പര്യവൈദ്യത്തിന്റെ സിദ്ധികളിൽ പലതും തലമുറകളിലേക്ക് പകരാതെ മൺമറഞ്ഞുപോയിട്ടുണ്ട്. പാമ്പുവിഷം, ആസ്തമ, മഞ്ഞപ്പിത്തം തുടങ്ങിയ രോഗങ്ങൾക്ക് ഫലപ്രദമായ ഒറ്റമൂലി പ്രയോഗങ്ങളിൽ ഇവർ പ്രാവീണ്യമുള്ളവരായിരുന്നു.

മന്ത്രം, ജപം, ചരടുകെട്ടൽ, ഊതൽ, ഉറുക്ക് എഴുതിക്കെട്ടൽ, ബാധ ഒഴിപ്പിക്കൽ, കൂളിയെ കാണൽ തുടങ്ങിയ വിശ്വാസങ്ങളും രോഗശമനത്തിനുള്ള മാർഗ്ഗങ്ങളായി ചിലർ സ്വീകരിച്ചിരുന്നു.

ആധുനിക വൈദ്യശാസ്ത്രം വ്യാപകമായിട്ടും, ആദിവാസികൾ പ്രാകൃതചികിത്സാ സമ്പ്രദായം തുടർന്ന് വരുന്നതായി കാണുന്നു. പലപ്പോഴും രോഗം മൂർദ്ധന്യാവസ്ഥയിൽ എത്തിയാൽ മാത്രമേ ഇവർ ആധുനിക വൈദ്യസഹായം തേടാൻ തയ്യാറാവുന്നുള്ളൂ.

🎭 സാംസ്കാരിക ചരിത്രം

സംസ്കാരസമ്പന്നമായിരുന്ന ഒരു പ്രദേശമായിരുന്നുവെന്ന് തെളിയിക്കുന്ന പല ചരിത്രാവശിഷ്ടങ്ങളും ഇവിടെ കാണാം.

പടയാളികളായെത്തിയ നായന്മാർക്കും കുറിച്യർക്കും ശേഷം കച്ചവടത്തിനായെത്തിയ മുസ്ലിങ്ങളും 50-കളിൽ കുടിയേറിയ ക്രിസ്ത്യാനികളും ഈ പ്രദേശത്തിന്റെ സാംസ്കാരിക ചരിത്രത്തിന് ഗണ്യമായ സംഭാവന നൽകിയിട്ടുണ്ട്.

🌾 പുരാതന കാർഷിക ഉത്സവങ്ങൾ

കൃഷിയും വിളവെടുപ്പുമായി ബന്ധപ്പെട്ട് ഈ പഞ്ചായത്തിൽ നിലനിന്നിരുന്ന പുരാതന കാർഷിക ഉത്സവങ്ങളാണ് കംമ്പളം, കോയം, വാരൽ എന്നിവ.

🎉 പ്രധാന ഉത്സവങ്ങളും ആഘോഷങ്ങളും

🏹 ആദിവാസി സമൂഹങ്ങളുടെ ചരിത്രം

കോട്ടയം രാജാവും കുറുമ്പനാട് രാജാവും ചേർന്ന് വയനാട്ടിലെ വേടരാജാവിനെ യുദ്ധത്തിൽ ചതിച്ചുകൊല്ലുകയും വയനാടിനെ രണ്ടായി പങ്കിട്ടെടുക്കുകയും ചെയ്തു. ഈ രാജാക്കന്മാർ പതിനൊന്ന് നായർ പ്രമാണിമാർക്കായി വയനാടിനെ വീതിച്ചുകൊടുത്തു.

ഇവർ ഇവിടത്തെ ആദിവാസികളെ ഇച്ഛാനുസരണം അടിമപ്പണി ചെയ്യിച്ചുപോന്നു. ആദ്യകാലങ്ങളിൽ പണിയർ കാടുകളിൽ താമസിച്ചും കാട്ടുകിഴങ്ങുകളും പഴങ്ങളും മറ്റും ഭക്ഷിച്ചുജീവിച്ചു പോന്നു.

കുടിയേറ്റക്കാരുടെ വരവോടുകൂടി ഇവരുടെ തനതായ സംസ്കാരത്തിനു മങ്ങലേറ്റുതുടങ്ങി. മഴയത്ത് ചൂടാൻ “കൊരമ്പ”യാണ് ഉപയോഗിച്ചിരുന്നത്.

തൊണ്ടർനാട് ഗ്രാമപഞ്ചായത്ത്

ചരിത്രവും പൈതൃകവും സംസ്കാരവും ചേർന്ന നാടിന്റെ കഥ